کوردستان فردا
یکشنبه ۲۷ آبان ۱۳۹۷ ۱۰:۰۵

دڵپاکی مامەڵەن

هومایون موحەممەدنژاد

خشەخشووگەڵای چیروو پایشەنە، دنیاو خیاڵیش،چڵاکنێرە و دیسانەو گنێوە ڕاو “مانەرا”ی، قاچێش لەرزای لەرزێنێ، جارجاریچ تیجیارووڕۆجیاری،سەروو
کەشوو”هەرات”ینە ،چەمێش پێکنێ و سه‌ختی و سەخڵەتی ڕاکێ ،فرەتەر کەرێوە ، ویروو قسەکاو لالۆحسەینی هەڵای گۆشێشەنە دەنگێ مد٘اوە و دڵوو وێشەنە واچێ:خود٘ا ساحێب ڕەحما.
هەرسەو چەماش،چەنی هارەقوو تەوێڵێش،تێکەڵی کەرێ و ورکە و مانیایی مێمانوو گۆنایش بێنێ.

ڕاکێ نەتەمامیێ و لالۆقالەیچ دماوە جە ویرشەنە، ڕوه‌کاش ویارنێ،حاجی ڕەشید، پیروودەگای، ماچۆ :

قاڵەگیان! ئۆخرت خێر بۆ سەباحی ساڵحان کۆگە ملی؟!

لالۆقالەیچ جە خود٘ایش بێ ،یۆ ماتڵش کەرۆ ماچۆ:

سڵام حاجی گیان!وەڵڵا گەرەکما بلوو پەی مانەرای. حاجیچ ماچۆ:

پەی شوومی ملی خۆ هەنگووری خاس نەیاوەینە!

– بەڵێ پاسەن ،هەرمانێوەتەرەم هەنە.

حاجی پیای پیایانە بێ فره نەلا سەرشەرە
،ماچۆ:
دەی خاسا گیان بێ وەی بی.

لالۆقالەیچ ، نه‌فه‌سێوه‌ ڕاحەتێوەش

کێشتێ،ئاخر ئەگەر واتایاش پەی تەماشاو تەڵەکا ملۆ،لاو حاجیەو تەرێق بێوە.

لالۆقالەیچ کەوت ڕانە و لاقۆرەکاش گەورەتەر نیێ و چنی وێش قسێ کەرێ :

بەخود٘ا! ئەگەر حەز کەروو پی هەرمانێ ،
گردوو گیاندارەکام وەش مسیا ، ڕوەو بێ دەسەڵاتی سیاوە بۆ، دماتەر هەناسێوی سەرد کێشێ، دیسان واچێوە:

خود٘اگیان! وێت زانی!!!

کەلووهەراتی دوورەو وێش ئەرمانێ ڕاویەرەکەیچش هەنگامەکاش تن تەر کەرێوە ، ئاننەش پنە نەشی دلێ شوومەکێش نیشتەره و پاڵەکێش وەتێ
ئەنگووس و گلکەو پایش،بلۆقێش که‌ردێ بێنێ!

خەموو یانەی و جوابوو لالۆحسەینی قەساب و چەمەڕایی سیروانی وەروو چەمیشەو پێسەو فیلمی ئاما و لوای کەرێنێ، پاته‌ دڕیایه‌کاو سیروانی، بۆوەو
کەبابوو یانەهامسای،وەقرەش جە لالۆقالەی گێرتە بێ .مێمانت بۆ ، کۆڕت تاسەو گۆشت وارد٘ەی و حەز بە بۆوەو کەبابی کەرۆ،قەسابیچ واچۆ :حەسابی وەڵین نەدریان،کۆڕیچ بە سەرشۆڕی گێڵۆوە.

لالۆقالەی پەی چن چرکیوی نقموو خیاڵا بیه‌ بێ.

دەنگێو دوورەو ئامانە گۆش :لالۆ !

لالۆقالەی نمەژناسی ،ڕەفێق و هام مامەڵەو تاتەیما؟

لالۆ قالەیچ ماچۆ :

-ڕۆڵەگیان!جارێو بۆ تاوێو بنیشمێرە و چایێو بوەری و مانیایێچت سەیۆوە.

ئاد٘یچ ماچۆ:

لالۆگیان! دێرا مەتاوۆ فرە بنیشوو ،ماوا و
هەوارگاو لالۆقالەیم گەرەکا.

لالۆقالەیچ ماچۆ:
بۆرە گیان وێمەنا ، پەی مامەڵەی ئامانی ،ئامادێنێ ؟!

ماچۆ کۆڕوو کێنی و نامێت چێشا؟

ئاد٘یچی واتش :

هامنۆنا کۆڕوو بورهانی تەوێڵەی.تاتەیم
واتەن ئەر پۆسوو دەڵەکێت با بسانووشا.

لالۆقالەیچ ماچۆ:

هامنۆگیان بۆرە با پێوەرە بلمێ سەروو تەڵەکا بزانمێ گێرتێ نێشا.

تەڵەکێ کاروو وێشا کەردە بێ ،یۆشا دانێو و یۆشا دوێ دەڵەکێ بیێ بێنێ تەڵەو.

هامنۆیچ ماچۆ:

تاتەم واچێ باوڕیچ مەکەروو دەڵەکێت با، پاسەیچ نیا و ڕەنگا نەتاوۆ گردی بەرووە، مەگەر سەوای بەووە شوونیشا.
لالۆقالەیچ هەناسێوش کێشت و واتش :

-کۆڕم ئینە مامەڵەن،خود٘ا وێش بەشکەرا.

هامنۆ زەڕوو دەڵەکەکاش دا دەسوو لالۆقالەیەو و ڕاکێ لاکامنە و تەرتیبایش گێرتەنە وەر .

لالۆقالەیچ باخەلە پەڕ جە زەر و دڵوەش ئاماوە دلێ دەگاوزاوەری،هەڵای پەی نیمەرۆیچ فرەش مەنە بێ.

گردوو دووکان و بازارەکەی جە هانەقاڵاو هەتا لاو مزگی و وەزەبەرزە ،قەسابخانە وینێ و ئەرەجیێش لاکەگۆشتێ ئاڵووچیەنێرە.

لالۆقالە وەروو قەسابیەکەی مدرارە و ڕۆوەش کەردە لالۆحسەینی و ماچۆ:

زەحمەت نەبۆ ئا لاکەگۆشتێە بنیەرە پەیم.

لالۆحسەینیچ ماچۆ:

لالۆقالە! چێشتا فەرماوا؟!

-عەرزت کەروو ،ئا لاکە گۆشتێە جیاش کەرەو پەیم، زەرکەش چن کەرۆ ،دێریچا بەش زوو وزیم را مێمانێما هەنێ.

لالۆحسەین زوانش مدرا و گەرەکش بێ.
قسێ کەرۆ،لالۆقالە ماچۆ:

دڵپاکی ،مامەڵەن….